Свята бульбы ў Грабянцы

        11 верасня 2021 года,  ў вёсцы Грабянец адбылося народнае гулянне, прысвечанае “другому хлебу” Беларусі. Гасцей вітаў Бульбафэст, арганізаваны   Грабянецкай бібліятэкай-клубам.

     Праграму  адкрыла бібліятэкар Святлана Аляксандраўна Пархамовіч. Яна расказала адкуль прыйшла да нас бульба, пазнаёміла з бульбянымі рэкордамі. Беларусы ганарацца сваёй бульбай. Пра яе вершы, песьнi складаюць. Яна – самы папулярны харчовы прадукт. Дапамагала весці праграму Алеся Шчакала,  і яна цудоўна чытала вершы пра бульбу. Весела і бурна ўспрыняла  публіка ўсходні танец ў сольным выкананні жыхаркі Грабянца, армянкі па нацыянальнасці Арменуі  Мкртчан. Свой канцэрт прывезлі  на свята госці:  калектыў  Чэрвеньскага раённага цэнтра культуры і адпачынку ў складзе Вольгі Лаўніковіч, Міхаіла Шчэрбача і Андрэя Хурсевіча. Іх песні паднімалі настрой, радавалі публіку, і многія госці свята энэргічна  танцавалі пад вясёлую  музыку. 

    На працягу ўсяго фэсту можна было пачаставацца беларускімі  стравамі і прысмакамі.         Пачастункі перамяжаліся конкурсамі — віктарынамі пра бульбу і гісторыю тутэйшых мясцін.На гулянні былі аформлены:  шыкоўная   мастацкая кампазіцыя з новага ўраджаю “Дары восені”,     пляцоўка «Гульнёвы падворак», шматлікія выставы- інсталяцыі з падручнага матэрыялу. Прыемна было пазнаёміцца з вырабамі, зробленыя рукамі жыхароў тутэйшых мясцін і набыць патрэбныя рэчы. Тут былі ўпрыгожванні з бісеру, вырабы з ласкутоў, травяныя чаі ад Васілінкі, мёд ад Андрэя Баброўскага. У памяшканні бібліятэкі дзейнічала выстава чайнікаў і самавараў розных часоў. А жыхарка Грабянца Алена Валасенкова-Галкіна арганізавала  дэгустацыю чаю   з  лісця вішні,  маці-мачахі, донніка, з пялёсткаў ружы…Яе дачушка Васіліса прадставіла выставу-вернісаж сваіх малюнкаў з краявідамі роднага краю.

Прыемна адзначыць, што на свяце ўвесь час прысутнічала старшыня Чэрвеньскага сельскага савета Наталля Уладзіміраўна Свірыдовіч, яна прынімала ўдзел  і ў арганізаваць свята. 

Дарэчы, для Грабянца правядзенне свята бульбы становіцца ўжо   добрай традыцыяй. Аб гэтым сведчыла фотавыстава, на якой дэманстраваліся здымкі з Бульбафэста 2018, 2019, 2020 гадоў.  Народнае гулянне плануецца праводзіць штогод і надалей, і што гэтае святочнае мерапрыемства стане адметным  для жыхароў вёскі Грабянец і ваколіц.